هوّ وهيي

خيالها كحل لجفن هالأرض..
وخطوتها هزة خصر
بيوقف على حيلو شجر تيهرهر الورقات.
ومن الخطوة تلملم عطشها
من أول النهر بتنحدر غيرة السواقي..
بقصد أزعر لتفيق قصبها
ومن أصابع الهوى الملبكة بلمستها..
تتسرب النسمات
وتغلغل دفاها بالقصب
ومن نئوزة مشيتها تسرق لحنها
بيتعب هالقمر من كتر المشي..
بيقعد على خيالو
بتستحي عناقيد الكرم
بتتعرق قبالو
ومن كتر الخجل..؟
بتعصر على شفافو خمرها
بيوقف على غياب الشمس تيكفي المشي..
وهو جسمو اللي متل النخل.. ألفها
بنت صغيّرة ضفايرها عشق عم تجدل الكلمات
تتجرب تلاقي وصف بهاللغة توصف ولفها
غريب وطل على عمرها الأخضر حامل الغيمات
وما انتبه أنو رحيلو مطر ع غابة حزنها
غفيت على عشقا اللي اندلق صوتو حابس الدمعات
وحلمت بأنو التفتلا
ومن نظرة عيونا عرفها ..
عتبة على عتبة عم يطلع صوتها يحلف إلو
بحياة همزة هالأرض ترجع
نادر هالقلب دقاتو عخطوتك يرصف نبضها

جايي اللغة تشلح تيابا على شفافِك

يا أنتِ وأنا والليل وشوية حكي ..

بحلف بكل الدني ..

اللي بيسمعكِ بيدوق الخمر..

وبحلف بكل العمر..

بيسكر بمطرحو آدم إذا شافِك


ملاحظة :
يجب قرائتها باللهجة السورية حتى تكون واضحة ومفهومة .

رقيق هالنص ، كلماتوو جميلة
تشكرات متأخرة ،
السعادة لك اخي ....