الحكواتي..

مرحبا يا انتوا...
اليوم وانا بالشغل طلعت معي هي الفكرة..
الموضوع مبين من عنوانه رح اشرحلكن.
هلئ هو موضوع استمراري .
كل عضو من الاعضاء عندو قصة او موقف صار معو او مع قرايب اله رفيق بيعرفه بيفوت بيحكيه.
مابعرف اذا فهمتوا علي.
رائيكم بالموضوع.
ومابعرف اذا هون مكان او لا
هي لامر للمشرف يلحشوا بالقسم تبعه..

ياعيني عليك وعلى افكارك وبالأخص وانت بالشغل

اي هون منيح مبدئيا منفكر ندرس وضعك ونلائيلك مكان

بس الفكرة ظريفة وفضايحية كمان


يلا يا معلم منشوف راي الاعضاء وباشر انت بأول قصة

أي فهمنا عليك خيوو
حلوة الفكرة عجبتني
ان شاء الله نسمع حكايات شيقة
يسلم مخيخك للي بيجيب هيك افكار
في إنتظار أول حكواتي
تقبل مروري و تحيتي

فكره حلوه

بس الحكواتي بيكون بالاختيار ولا اللي بيفوت بيحكي ولا شو

الي عندو موقف قصة اي شي بيفوت بيحكي مافيها اختيار.


لورد هي المرة انت بلش مو كل مرة انا

كان يامكان مو من كتير زمان

كان في اميرة صغيرة مابتعرف شو الهم ولا الاحزان عايشة ببلاد مافي

من جمالا بكل الدنيا فيها بتغرد العصافير عند الصباح وبتفيئ هالناس

وبتفيئنا نحنا متل هالناس

الاب بيروح على شغله بعد مايشرب فنجان قهوته وبوسة حنونة بيطبعا على

على جبين الولاد

بيجي دور هالولاد بعد مايلبسو مراييل المدرسة وبيحملو الشنتات

وغمرا وبوسة من امهم مع كتير كتير من الدعوات والتوصيات

وبفرح على مدرستن بيتم الانطلاق

وهيك الام بتشغل وقتا بكل شي فيه راحة هالعيلة الحلوة لتخلي كلشي

احسن وغير عن كل بيوت الجيران

لحتى بيوم من الايام مدري شوصار ....او لا .. بعرف شو اللي صار

كلمة حرية عليت بشوارع هالقرية الصغيرة الحلوة اللي ماكان في بجمالا

وماناقصها غير هالحرية ليصير كلشي من احسن ماكان

حرية .... حرية .....

اسقاط نظام .... اسقاط نظام

رصاص صار من كل مكان

شهيد غريق بدمه شالو الشباب

زغردت النسوان كبرت الرجال

ركضت الصغار منها كان فهمان ومنها ماعرفان شوصار

كتر الرصاص .... وكترت الشهداء .... وغرق الدم الشوارع

وحقد زاد ... واصرار عالحرية صار اكتر من قبل بزمان

وهيك الرصاص صار قذائف وبراميل وطيارات

وهالعيلة الصغيرة متلا متل غيرا غاب عنها الفرح

وبيوم من الايام

وبغمضة عين فئدت هالعيلة الاب اللي كان مصدر قوة للاطفال

والام صارت هيي الاب والام والقرايبين وكلشي لها لصغار وبلشت معهم مشوار

طويل في الكتير من الصعوبات

بس ابدا ماكان في ضياع

لان كانت هالام عرفاني شو بدها من هالزمان وقررت مع الولاد توقف بوجه كل

الرياح وتكبر ولادا وتعلمن وتحميون ليصيرو اقوى مما كان

وانشالله بكملكن الحكاية وقت هالولاد بيردو شوي من الاحسان لها الام اللي

رضيت بكل شي من هالحياة بكلمة الحمد لله

.........................................

هي الحكاية كنت كاتبتا من سنة تقريبا بس هلا وقت شفت هاد الموضوع

طالعتا وعدلت عليها شوي بعد ماضحكت انا على الطريقة اللي كنت كاتبة فيها

وحبيت تكون هون انشاء الله تعجبكم

واذا ماعجبتكم بتكون مجرد محاولة مني

محاوله جميله
استمري

رائعة شمس

رح اكتفي بهالكلمة لان انتي الوحيدة اللي بشعر كل الكلام صغير ادام

كلماتك واحساسك

ربي يحميكي من كل شر

وين الحكواتي ؟؟؟؟؟؟؟؟؟؟

وين ..... ؟؟؟؟؟

وين ....... ؟؟؟؟؟

وينكن كلياتكن ؟؟؟؟؟

لم تعد هنآك حكآيآت بعد حكآية شمس .....

حكآيانا بآتت لآ شيئ

بجد لي الحكايات الي بنسمعها زمان كان لها وقع اكبر من الي بايامنا لدرجه انه نحفضها من اول قرائه

والله عندي حكاية غير شكل....