منتديات تيرا الحب - عرض مشاركة واحدة

12-23-2024, 01:42 PM

الله بيعلم قدّيش فرحنا لفرحكم يا أخي،
للحظة نسِينا إنّنا في حرب،

تمام، هأحكيلك رأيي رغم إنّي مش كتير بخوض في الأمور السياسيّة،
"مش خوفًا من شي لكن لراحة بالي لأنه السياسة بتجيبش إلا وجع الرّاس"

هاد رأيي الّي ما بتغيّر من أول تصعِيد وعيت عليه من لمّا كان عمري 9 سنوات في 2008
ومرُورًا بكلّ التّصعيدات لحد حرب 2023 امتدادًا لهاد اليُوم،
مع إنّه كلامي يمكن ما يعجب كتير ناس،
وما بقدّر أصرّح فيه على مواقع التّواصل الشّخصيّة،
لكِن يمكن هنا تكُونلي فرصة رغم الانتقادات الّي بنشوفها لحاملي هاد الرأي الذي لا يتناسب مع فِكر بعض النّاس،
خاصّة الّي مش عايشين في غزّة نفسها،
"لأنه بنظر الناس الّي برّا غزة إنّه حماس هي المقاومة فقط وبطبلولها كتير وبصورونا إنّنا الشّعب الأقوى ـ يعني ما بصير حد من غزة ينتقد حماس لأنه بنظرهم شعب غزة انخلق للمقاومة بس (وهاد شيء فخر النا طبعًا وما بعيبه، إنّما فقط بعيب نظرة النّاس)
لأن الّي بنتقد حماس عندهم هو عميل وغير وطني!
وهاد كلامي لا يعني إني بأيّد حركة فتح،
كل الانقسامات هاد ما جابتلنا إلّا خراب الدّيار.

هلقيت سؤالك:
بتاريخ 7 أكتوبر المفروض كل مُسلم حُر فرح بهاد التّاريخ لوقع وتأثير هالتاريخ على اليهود،
غير هيك فش سبب تفرح لأنه احنا عامة الشّعب كنا عارفين شو هيصير بعدها،
- لمعرفتنا المُسبقة بوحشيّة الاحتلال على مدار سنوات الاحتلال-

ف يعني معقول لمّا بلّشوا بالتّخطيط للسابع من أكتوبر ما حدا توقّع هاد الشّي!!

هلقيت بحكيها مع الأسف نتائج هاليُوم ما كانت محسُوبة أبدًا،

ومن رأيي إنّه إسرائيل جيش بتدعمه دول أجنبية وعربيّة مُسلمة يا أخي، "معنويًّا وماديًّا"
أمّا فلسطين نفسها مقسمة ألف تقسيم، والوحدة معدومة!

وغزة الصّغيرة لا تمتلك جيش أصلًا فهو واضح عند كلّ إنسان همّه أولاد شعبه أنها غير قادرة على مواجهة هاد العدو الوحشِي بكافة إمكانياته الجويّة والبريّة والبحريّة!
، " علمًا إنّي ما ببخّس بأعمال المقاومة، بالعكس الشباب بتعمل أشياء بترفع الرّاس" لكن يا عمّي واللّه حرام، غزة مش جيش ولا دولة عُظمى كمَا يُصورها العالم الخارجي،
وحماس لا يحق لها إهدار شعب كامل وهدم الحياة فيه لأي سبب كان،
ولا حتّى الظ±سرى " اللّه يفك أسرهم عاجلًا غير آجل"،
لأنه مقابل تبييض السّجون بتم حاليًّا إبادة شعب كامل وتبييض غزّة من سكانها!!
ولا حتّى القدس أغلى من دم مُسلم بريء!

إنْ صح الصّحيح فـ أنا أعيب حماس بأشياء كتيرة،
وفشلت فشل كبير في كل شي وأهمها حُكم غزة من البِداية،
أمّا رجال المقاومة بخلاف فصائلهم لهم كل الاحترام والدّعاء،
الله يسدّد رميهم ويحميهم،

تحرير فلسطين بدّوش غزة بس، إنّما بدّه الوحدة العربية الإسلاميّة،
لأنّ القُدس مش لغزة ولكِن لكل مسلم في هاد العالم!

،
لكِن يا أخِي ما بنملك هلقيت إلّا الدّعاء،
لأنّه الواحد بعقله ألف سيناريو ورواية وسؤال!
وأهمها هل حماس فعلت كل هاد الشي في سبيل الله!!
ومن بداية الحرب بحكي أنا بريئة من كل جهاد ليس في سبيلِ اللّه،
وإنْ كان هذا في سبيلك فإنّي رضيتُ فَـ ارضَ عنّي يا اللّه.