ثورة انثى

ثورة أنثــى .....

بتشوفها كتير .. بنضارات شمسية ، ماسك طبي ، ، شال فلسطيني ، ...

أسعفت مصاب وأوعيها إتلوتت من دمه ... ما همها المسكرة تسيح أو الحمرا تروح ... كزبت على أهلها منشان تنزل وتهتف مع يلي عيهتفوا ...
...
يمكن مالها محجبة بس لبست شال منشان لما تتصور ما يعرفوها ... لبست بوط رياضة منشان وقت يبلش الرصاص تقدر تركد ...

مشروع التخرج تبعها كان صورة دبابة وطفل مستشهد وقت ما زملائها كانوا بيرسموا مزهريات وفواكي ... شهيد بيشيع شهيد وتنين وتلاتة وأربعة وزملائها
بيصوروا عصفور بيشرب ....

دفعت معاشها ويلي تحت البلاطة تبرعات شي كفالة أيتام شي إطعام عائلة نازحة شي معدات طبية إسعافية ...
بتغير صوتها عالموبايل وتفوت بمدخل بناية منشان أهلها ما يسمعوا صوت المظاهرة ...

لا تسألها عن مهند ونور و تامر حسني و ثمن عمري والإستقبالات والمباركات وآخر موضة بنطلون.. سألها عن المنشورات والبخاخات وأعلام الإستقلال وعبارات اللافتات وآخر العيل النازحة يلي عمتأمنهون


لمحت شب مسكوه الأمن ورايح الله أعلم فين ... ركدت تخلصه بإيديها وسنانها .. وما همها تاكل القتلة معه وتنسحل بشارع بوسط صمت الناس وفرجتهون عليها..

شافت أطفال بتندبح ونساء تغتصب ورجال تنعدم جماعي ... ومع هيك بيسألوها بكل تفاهة شو يلي مطالعك من بيتك ؟؟ بترد عليهون أنتو شو يلي مقعدكون ؟؟

مفرداتها أتغيرت من كتر اللي بتشوفه وييجي حدا بكل برود بيسألها : كيف (بنت محترمة) بتحكي هيك
!! ...
هي هيي اللي أخوها أستشهد قامت أخدت مكانه... هي اللي خطيبها اعتقل وكانت قوية وما إنهارت.. هي يلي زوجها أستشهد وتركلها الولاد وما تزحزحت عن مطلبها ومطلبه... هي اللي ألتم عليها الشبيحة وشلوحوها حجابها ونزلوا ضرب فيها .. ولسا رافعة راسها وحالفة لتجيب حقها وحق الكل ...

عفكرة هي هيي نفسها يلي كانت تموت على كل شي لونه زهري من الدباديب للإكسسوارات للتياب للسكربينات والجزادين

هي هيي نفسها يلي كانت يحمروا خدودها لما تسمع مسبة بين تنين زعران بشارع

هي هيي نفسها يلي كانت تخاف حتى تركب بتكسي لحالها وتروح على مكان ما بتعرفه ..

هي هيي نفسها يلي كانت رنة موبايلها إليسا ونانسي وتخاف على أضافيرها لتنكسر
هي هيي نفسها يلي من بيتها لمحاضراتها ومن محاضراتها لبيتها ..

هي هيي نفسها يلي كانت تحلم بفارس مقدام على حصان أبيض جاية ياخدها من بيتها على قفص الزوجية السعيد

قالولها مالح تتجوزي لأنو الرجال ما بيحب البنت اللي شخصيتها قوية ، آخر همها ترضي هيك شخصية مريضة .....

خلص هي ثارت وسمحت للتغيير يوصلها.. ومالها راجعة ...

مالها راجعة ينقلها شو تعمل وشو تساوي وكيف تعيش حياتها

هي اللي بتحط بسمة علي وشك ووشي لما بتضحك ... وهي هيي يلي قوتها لح تخلي بلدنا تنولد من جديد
هي اللي كل الشباب بتتشيك زيادة وبتحط بارفاننا الأصلي لما تعرف أنها موجودة أو جاية
هي هية يلي بدا تروح كل يوم عالسوق وتنقي قطعة مميزة صارت تتبرع بكل تيابها
هي هية البنت السورية..



[عزيزي الزائر يتوجب عليك التسجيل للمشاهدة الرابطللتسجيل اضغط هنا]

جميله جداااااااا كلماتك


لاتبقى الامور كماهي بعد الثورات

تسلم ايدك امير

شو يلي مطالعك من بيتك ؟؟ بترد عليهون أنتو شو يلي مقعدكون


عنجد سمعت هالكلام من بنات بسوريا وبيطلعو مظاهرات وحدة منن اتصاوبت وماعد فية تطلع وتشارك معن بس كانت توقف على البرندا وتشاركن الصوت
عنجد بفتخر انو هالبنات من عيلتي والله يجمعني فين يارب
والله بنات سوريا بيرفعو الراس الله يحمين يارب ويئوين


قالولها مالح تتجوزي لأنو الرجال ما بيحب البنت اللي شخصيتها قوية ، آخر همها ترضي هيك شخصية مريضة
طبعا اخر همها لانو همه الوحيد هلاء هو الحرية لبلدة واهلها مافي اي شيئ تاني بباله
وان شاء الله لما ننتصر ويجي نصيبن والله مارح تئبل بواحد جبان قاعد ببيتو ورح تحتقرو لابعد الحدود لانو هي اعلى
وبتستحق الأفضل منو



عنجد موضوع رائع جدا وبيستحق الترشيح
دائما مواضيعك رائعة ومميزة اخي رامز
انا حبيت هالموضوع كتير لانو حقيقة لامست مشاعر كل السورين
والله بتمنى من كل قلبي كون معن وساعدن
الله يعطيك العافية
دمت ودامت سوريا حرة ابية

مزبوط هدول حرائر سوريا

عزة سوريا ورودها وياسمينتها

هدول اكبر من الشمس وابعد من السما

هدول يا اردنيين ما بيتزوجو الى الشرفاء

نورتي ندى واكيد بعد الثورة في كتير تغييرات اورح يتغير كلشي

نورتي اختي ياسمين

وعلى قولتك هدول فر كل سوريا

تيجان رح تبقى على وسنا طول العمر

اذا كان الشب دفع تمن الحرية مرة

هدول دفعوها كل يوم مية مرة

نورتو من جديد