04-14-2011, 11:25 AM
|
#3
|
|
المدونة الثانية
وهى لطالب بكليه هندسة عين شمس ، و يبدأ حديثة :
كتير مننا سمع عن قصر البارون وسمع عن انة مرعب وكدة
اكيد هتقول زيى دة كلام فارغ .....يا عم انت بتصدق
لما قررت ادخلة كنت فى اولى ثانوى ...
لاقيت انة قصر غريييييب بجد
ماكنتش مصدق ان ممكن يحصل لى حاجة
كل اللى شوفتة شوية خفافيش وبقايا حفلات عبدة الشيطان ..ماتتخضش قوى دة شوية دم على الحيطان وعلى مراية متكسرة فى الدور التانى
وكنت كل مرة باكتشف مكان جديد جوة القصر
مع انة مش كبيير ..دخلتة 11 مرة ..مش مبالغة على فكرة
كنت بادور على مكان معين قريت عنة اسمة الحجرة الوردية
بيقولوا انها ادهنت بلون الدم لما توفى البارون امبان 0(صاحب القصر وهو مهندس بلجيكى )
ووصلت للحجرة دى ... ومالقيتش حاجة من اللى سمعتة لكن
شكلها يخوف بجد لانها فى البدروم وفيها مدخل ممر يوصل الى اسفل كنيسة البازليك
كنت اخر واحد يصدق ان فى حاجة اسمها مكان مهجور وفية حاجات تخوف والحاجات دى
لحد فى يوم قررت ادخل مع واحد بس من اصحابى واتفقنا كل واحد يمشى لوحدة فى القصر ونرجع نتقابل فى غرفة متفقين عليها ونحكى اية اللى حصل
بالمناسبة يا جماعة كنا بندخل من وراء الحراس بنجرى وننط من امكن عارفينها وكنا بنراقب الحراس من جوة كمان
المهم
ماحدش قدر يكمل الجولة لوحدة لان بجد صعب
لاننا دخلنا الساعة 9 بالليل وطلعنا الساعة 12 الا ربع بالليييييل
حصل معى قصة
ممكن نعرف الاول شوية معلومات عن القصر
القصر نفسة مكون من طابقين فوق الارض والدور الارضى وحاجت كتير تحت الارض
الدور الارضى موجود فية حوالى 4 غرف حاليا فاضيين لكن كانوا للمكتب وحجرة البلياردو وحمام ومدخل للبدروم
الدور الثانى ممكن تتخض شوية لو اول مرة تدخل لانة فى غرفة تقريبا بالكامل متغرقة دم على الجدران كان بقايا حفلات اسمها الطقوس السوداء بيمارسها عبدة الشيطان (جماعة ظهرت فى مصر من عدة سنوات تعترض على وجود الاديان وتمارس طقوس سحر واصلها جاءت لمصر من اسرائيل)
  جدران ملطخة بالدماء
وهتلاقى نجوم خماسية على الجدران لكن الكلام دة مش يخوف هتلاقى حمام بجانب الغرفة دى ...بجد بجد لو حد راح بلاشششششش يدخل اى حمام فى الدور التانى ..لما كنت بادخل مع الحراس فى اول كام مرة (من تحت لتحت طبعا) كان لما يقرب من اى حمام فى الدور التانى يقوللى اوع تفتح الباب ..طب لية ؟؟?ماتسبقوش الاحداث
المهم
هتلاقى غرف كتير فاضية وهتلاقى حمام تالت يقال ان لاقو واحد ميت فى البانيو ..ناس يقولو كان سكران وتانيين يقولوا انة اتقتل .. بس المهم ان كان واحد مات فى الحمام دة .. دخلت شوفتة لاقيت دم ناشف على البانيو لكن دة مش دليل على انة اتقتل لان الدور كلة اصلا مليان دم فماجتش يعنى على البانيو
وهتلاقى غرفة فيها دفاية قديمة وبراويز فاضية لان كل اللوحات والمرايات تقريبا اتسرقت
الدور التالت فية السطح ..الاسانسير ..شوية قعدات ومدخنة ..هتلاقى عمودين فى السطح وبينهم حديدة .الحراس قالو لنا دى كانت مقصلة وقع فيها راس المهندس اللى بنى القصر علشان مايعملش واحد زية ..الكلام دة غلط تماااما..فى غرفة متصممة بشكل معين بحيث تدخل الشمس فيها على مكان السرير علشان تصحى البارون (ياسلام على الروقان)
عارف انك زهقت من الكلام دة
لانة فعلا كلام عادى لكن هاقوللك .دى مجرد معلومات عن قصر شفتة وحبيت ادخلة لكن مع الوقت اكتشفت انة مش شئ كويس انك تغامر بالدخول للاماكن زى دى .لية ؟...هاقوللك
لاحظ انى ماقولتش حاجة عن البدروم لان دة كانت بداية المشاكل
كنت لما باطلب من الحراس حد ينزل معاى البدروم كانوا بيرفضوا ولما اسالهم قالوا انة مسكون .......
ماكنتش باصدق ان فى جن ممكن يسكن مكان ويمنع حد انة يدخلة الا فى حالات السحر الاسود ودة معروف ولان سفير بلجيكا نفسة جاء فى برنامج عن القصر وقال ان البارون امبان كان فعلا بيمارس السحر لكنة مش سحر اسود
الكلام دة مش بياكل معاى ..قررت اننا ننزل البدروم علشان ادور على الغرفة اللى قولتلكم عليها
لاقيت غرف كتيييير تحت ..عالم تانى وممرات ومطبخ ومدافن للخدم (ودة مكان مخيف قوى بجد ومقبض) ومشينا فوق المدافن علشان نوصل لمكان تانى مع ان غلط انك تمشى فوق مدافن (يعنى هو اللى مش غلط اننا ندخل القصر اصلا) الغرف اغلبها فاضية لكن شبة بعضها وممكن تتوة
والحمد لله وصلنا للغرفة الوردية
واحنا داخلين الحارس قاللى حاسب جنبك .لاقيت حفرة كبيرة فى الارض .سالتة اية دة ..قاللى دة مدخل ممر يوصل مابين القصر لحد كنيسة البازليك
طب تحت وهتلاقى المطبخ كانك دخلت الة زمن ..فية اسانسير الاكل وبوتجاز بالفحم الحوض زى ماهو ومواسير ينفع انزلة ؟؟قاللى لااااا فى 4 علماء اثار نزلو 3 ماتوا وواحد طلع عندة حالة عصبية ..(كلام مش مقنع ) ليه هم شافوا اية تحت ؟رد قاللى فى نظام حارس جنى بيحرس المكان (طب ماشى ) المهم والحارس بيشرح لنا المكان حصل صوت خبط قام الحارس سابنا وطلع يجرى وسابنا نخبط فى الظلام
فى رايىى ان لحد دلوقت مافيش شئ مش طبيعى ...لسسسسة ماتستعجلش
شوفنا اماكن كتير...مواسير ازاى وانتوا شغالين بالفحم؟؟؟ رد على الحارس قاللى دى مواسير فيها رولمان بلى لان القصر بيدور على تروس تحت الارض
كل الكلام دة كان الصبح
واتكرر السيناريو دة كتييير
لحد مازهقت
طب لازم نعمل حاجة جديدة جوة
اخدنا القرار باننا ندخل القصر بالليل ونشوف اية اللى ممكن يحصل
طب فى شوية مشاكل ..الحراس احيانا بيناموا فى القصر ..كنا بندخل على ايام نلخبط الفرش بتاعم وننقل تماثيل واحجار ونوهمهم ان المكان فعلا مسكون ..ونجحنا فعلا اننا نبعدهم عن النوم فى القصر لانهم خافو
الكلام دة بجد ماكنش سهل لان محتاج سرعة ( علشان بنط من السور وبنجرى ونوطى ونمشى على ركبنا ) محتاج خفى (للتنطيط مابين الغرف والابواب المغلقة ) قبل كل دة محتاج واحد مش بيحس (لان الجو نفسة بداخل القصر مرعب)
المممممممممممممهم دخلنا فعلا القصر الساعة 9 بالليل
وحصل شئ غريب معانا(كريم صاحبى وانا)
عارف انكم عايزين تعرفوا اية اللى حصل ..بس ممكن نسال سؤال قبل مانكمل ؟
اشمعنى يعنى القصر دة هو اللى مشهور بالرعب مع ان فى اماكن كتيير مهجورة وعادى يعنى ؟
سالت نفسى نفس السؤال ودورت وقريت وعايزكم تفكروا معاى
يمكن لان تاريخ القصر والحوادث اللى حصلت فية خلتة مكان مش كويس ؟؟ممكن
احب اقولكم ان فى حوالى 5 اشخاص ماتوا داخل القصر
اولهم كانت البارونة هيلانة اخت البارون امبان ..وقعت من شرفة غرفة وسقطت فى حديقة القصر واستغاثت بالبارون لكنها ماتت من النزف الشديد ومالحقش البارون ينقذها
ثانييا بنت البارون ..كانت تعانى من شلل اطفال ولاقوها متوفية فى بير الاسانسير لاسباب غير معروفة
ثالثا الخدم مات حزن على ابنة البارون ....واصيب البارون امبان نفسة بالاكتئاب ومات برضة (دة اية دة ؟)
وهناك الولد اللى لاقوة فى الحمام غير علماء الاثار غير وجود مدافن الخدم
طب لو افترضنا ان كل دة عادى ومش سبب جامد
البارون امبان استخدم السحر للاعتذار للبارونة هيلانة بعد وفاتها ويقال انها كانت غاضبة وكانت بتصرخ فى جلسات السحر ودة كان بيسبب خوف للناس
ومن زمان بدات سمعة القصر تسؤ حتى قرر السلطان حسين كامل شراء القصر من البارون لكنه رفض وبدات مشاكل البارون مع الحكومة المصرية مما زود الاكتئاب ومات
قريت ان عبدة الشيطان كانوا بيحضروا الجن ومش بيصرفوة والكلام دة حقيقى مع انى مش باصدق بسهولة وحاجة غريبة سمعتها هن اقوال عبدة الشيطان نفسهم هى ان خالد مدنى (احد مؤسسى هذة الجماعة فى مصر)تحدث مع الشيطان داخل القصر(كلام غريب قوى )
وهناك حادثة مشهورة حصلت سنة 82 يقال ان نار ولعت لوحدها بداخل القصر والناس فى الشارع كانوا شايفين والنار زادت والدخان اكتر وطلبوا المطافى ولاقوا ان النار بدات تنطفئ بالتدريج حتى انتهت لوحدها قبل المطافى ماتيجى ولما طلعوا لاقوا ان مافيش اى اثر لاى حريق
قريت الكلام دة اكتر من مرة لكن برضة مش مقتنع
حبيت اغامر وادخل مع صاحبى من وراء الحراس علشان ناخد راحتنا فى التسول بداخل القصر
وياريتنى ماتسولت
عايز اوصلكم الصورة بشكل اوضح
لو رحت(لاقدر الله ونويت تدخل)هتلاقى سور حديد عالى ..من الشمال فى عمارة ساكن فيها وزير الداخلية السابق ..من الشمال حراس للعمارات المجاورة وكلب حراسة بيجرى حتى وراء العربيات مش مصدق عدى من هناك..من الخلف هتلاقى حراس فندق البارون وفى الجنينة الخلفية هتلاقى حوالى 4 كلاب (اية التعقيد دة ؟؟؟)دة لو انت مش عاوز تمشى قانونى وناوى تغامر ..لكن مانصحش حد لانى كنت هاقضى ليلة لطيفة فى القسم مع ناس ظراف جدا فى مكان شاعرى اسمة (التخشيبة على مايبانلوا صاحب)
ايوة اتمسكت فى مرة بجد بس ربنا سترها والحمد لله ..عموما القصر قريب من قصر الرئاسة فدى كفاية قوى لاى حد
سؤال ..طب كنتوا بتدخلوا ازاى ؟؟؟
بقالى 4 سنين بادخلة 11مرة يبقى مش هاعرف ادخلة ازاى
لما كنا بنقرر اننا رايحين القصر كنا لازم نيجى ببناطيل واسعة ولبس غامق لان القصر دلوقتى مفتوح وممكن حد يشوفك وانت جوة ويكون كل واحد معاة كشاف وكنت احيانا باخد مطواة معاى (مش بعيش على فكرة لان سمعت ان فية ثعابين لكن ماشوفتش الصراحة )
فى مكان السور عنده اقل من الحديد(التقاء السور الحديد الجديد بسور القصر القديم) وبما ان السور القديم فية نهايتين فعندك مكانين تنط منهم
شافونا فى مرة بننط من واحد قفلوة وسابوا التانى (النصر بيد الاعداء احيانا) فبنط من التانى
ثانيا الكلاب
لو احنا ثلاثة افراد رايحين واتنين بس هايدخلوا فلازم الثالث يغطى ..يعنى يروح لمكان بعيد فى السور ويحدف طوب ويقرب من السور وكانة هينط فالكلاب كلها بتجرى علية وبالتالى فضالنا مكان نجرى منة واكيد هو بيبعد عن المكان كلة لما الكلاب بتجرى علية (تهويش)
ثالثا حراس القصر
احسن ناس متابعين التليفزيون هتلاقيهم قاعدين على الشمال بيتفرجوا ومعاهم شاى (المنظر دة مش بيتغير من 4 سنين) ساعات بيقوما ياخدوا لفة للاطمئنان بس مش اكتر فلازم تنتظر للوقت المناسب والثالث اللى بيغطى بيلف هو كمان (اللى تبعنا ) لو لاقى حد قام يلف يرن لاى حد فينا علشان مانطلعش فى اى شباك
لكن كل الكلام دة على الرغم من صعوبتة بس مش هو دة المقلق ...هو لعب عيال اة لكن برضة محتاج حد مستعد يغامر
لكن المقلق هو بعد ماتدخل القصر ..........وهو دة اللى انتوا مستنين تعرفوة وخصوصا المرة رقم 9
استراحة قصيرة
احكيلكم اللى حصل فى المرة رقم 9
complex equation cosists of real part &imaginary part
its like this story
i hope u could get what i wanna say
قررنا اننا ندخل المرة دى بشكل مختلف ..هانقعد جوة من الساعة 9 بالليل لحد اخر الليل علشان نشوف اية اللى هايحصل ونستكشف القصر براحتنا ..بجد كنا حاسين بشعور غريب وصلنا احنا الاتنين وهو (امشوا من هنا ).....قولتلة بص يا كريم اى حد فينا يشوف او يسمع اى حاجة غريبة لازم نفترض انها حاجة طبيعية علشان نعرف نكمل النهاردة ..كل واحد فينا هايمشى لوحدة ونرجع هنا فى الاوضة دى نحكى ..واتفقنا على كدة
اول ماوصلنا للمكان اللى بندخل منة لاقينا الباب مقفول ..قمت عديت وشيلت الحجر من وراة وفتحت الباب وعدينا ..بندخل من الخلف ...فى باب كنا علاطول بنلاقية مفتوح وبنكمل منة على باقى اجزاء القصر ..لاقيناة مقفول ..مش العادة ..فى الوقت دة جسمنا قشعر ..كريم :اية دة اول مرة الاقية مقفول ؟قولتلة ماتخافش هافتحة ..الباب دة لما تعدى هتلاقى على حمام وفية مدخل البدروم وشكلة يرعب ..فتحت الباب قولتلة تعالى ..دخلت وقولتلة افتح الباب على اخرة علشان لو فى حاجة نقدر نجرى ففتحة على الاخر ..بمجرد مادخل وحط رجلية الاتنين بعد خط الباب
الباب اترزع مرة واحد ة وجامد.....كريم كان هيموت من الخضة (لان الباب طولة حوالى 2 متر وعرضة حوالى 7سم وخشب وصعب انة يترزع بالقوة دى )عمرى ماهنسى شكل صاحبى فى الموقف دة ..قولتلة اهدى ماحصلش حاجة دة هواء ماتخافش .بس لازم ننفذ الاتفاق كلة طبيعى
دخلنا الحمام اللى على الشمال وهتلاقى فية فتحة للاسانسير ويقال ان بنت البارون لاقوها ميتة تحتة ..(قريت ان لو فى جان فى مكان انت فية دة بيخلى جسمك يقشعرجامد)..احنا الاتنين وصلنا شعور مقبض وكنا حاسين ببعض قولتلة :كريم اقرى قران قول اى اية..ويدوب لسة بنبتدى نقرى وسمعنا صوت خبط جامد من تحت ...واحد بيرزع بايدة 3 مرات ..سكتنا ...الصوت دة مش طبيعى ..مافيش حد غيرنا فى القصر اصلا والبدروم مافيهوش حد ....قلنا نطلع برة القصر وعارفين مكان من برة يدخل على البدروم وكمان نستريح..طلعنا ولاقيت ان مافيش اى حد دخل البدروم ..كان اعتقادى ان حد بيشتغلنا لكن طلع مافيش ..قولتلة نقفل الباب بمسمار بحيث لو حد دخل او خرج هنلاقى المسمار مش موجود ..وبالفعل قفلنا..ودة المكان الواحيد تقريبا المتاح حاليا للدخول للبدروم من خارج القصر
لما كناا خرجنا بعد الصوت ماحصل قفلنا الباب زى ماكان وحطينا وراة الحجر(حوالى 5 كيلو)
لما نزلنا كريم جالة تليفون وقعد البية يتكلم لحد مازهقت قولتلة انا هالف اشوف الجو قاللى ماشى
روحت اشوف الباب اللى قلناة بالرزة والمسمار لاقيت حاجة غريبة
مافيش مسمار والباب مقفول والرزة محطوطة وراء الباب ....ومافيش حد جوة ,,,خفت وجريت على صاحبى وجى وشاف وبقينا هانموت
واحنا واقفين سمعنا صوت الباب اللى كنا قافلينة بالحجر بيتفتح والحجر بيتزحزح جامد ...قولنا بس دة واحد من الحراس بيشوف لو خد دخل
لزقنا فى السور علشان مافيش حد يشوفنا لكن احنا نشوفة ...لاقينا مافيش حاجة
قولتلة انا طالع اشوف مين اللى فوق ..قاللى انت اتجننت هتطلع تانى ..طب نطلع مع بعض ...المفاجاة .....الباب مقفول والحجر فى مكانة ...
بص لى وسكت ..قولتلة ماتقلقش كلة طبييييييعى ..مع انى عارف وحاسس ان دة مش طبيعى ..قولتلة فعلا زى مالحارس قاللنا فى مرة ...القصر مسكون...وبالمناسبة دى هنهرج مع اللى ساكنينة ونشوف هيعملوا اية
ودى كانت البداية
دخلنا القصر تانى لكن بقلب اجمد ...ماحنا هانشوف اخرتها بقى ..وعدينا من جنب اول حمام من غير ما نبصلة ..وطلعنا الدور التانى ودة المكان اللى عبدة الشيطان كانوا بيعملوا حفلاتهم فية ..مدخل الدور هتلاقى فية دم على الحيطان وهتلاقى ممر كلة متغرق دم ..عدينا فى الكلام دة عادى ماحنا بنشوفة كل مرة لكن لاقينا اخر الممر مقفول ..اول مرة يتقفل والكلام دة يا جماعة فى الظلمة ومعنا الكشافات والساعة حوالى 10 بالليل
حسينا بشعور وحش قوى بجد قولتلة ان حاسس ان حاجة هاتحصل ..قاللى وانا
بس هانعدى وهانشوف كل حاجة ..ومشينا لحد مكان فية حمام ..الحمام دة جيت افتحة فى مرة وكان معاى الحارس قاللى ماتفتحش استغربت وقولتلة لية ؟سكت وماردش ولما سالتة لما مشينا قاللى اصلة فية خفافيش....قررنا اننا نفتحة فى الزيارة دى ..تعرفوا لاقينا اية ؟
دة المكان اللى لاقوا واحد ميت فى البانيو لاسباب غير معروفة ...دخلت وقعدت على البانيووشوفت الدم بس بعد التمحيص ماعتقدش ان الراجل اتقتل ..الصراحة الحمام مقبض جدا لكن مافيهوش خفافيش
كنا بنحاول نهرج علشان نغير الموود ونشوف نوع السيراميك المصنوع منة الحمام كليوباترا ولا سيراميكا الامير؟ (ياسلام على الروقان)
المهم
طلعنا وكملنا مشى ودخلنا الغرفة اللى كلها دم
وقعدنا نحكى ونتكلم كاننا فى مكان عادى وكنا واقفين فى البلكونة ولا كاننا فى بيتنا..كان فى مراية متكسرة وعليها دم فى الاوضة دى وكنت واخد منها تذكار ..حتة صغيرة ..ماكنتش اعرف ان الدم دة كان بقايا لطقوس سحر (ودة اللى اتاكدت منة من اللى حصل معاى بعد كدة ) كله هاييجى فى وقتة
المهم خرجنا من الاوضة وطول ماحنا ماشيين كل واحد حاسس ان فى حاجة هاتحصل
طلعنا الدور التالت ودة خطر لان السلالم من غير سور ومش مترممة بس المهم طلعنا السطح
وقعدنا نهرج ونلعب فوق ونتصور ونبص على مصر الجديدة من فوق ...المنظر فوق جامد بس خطر لانك مكشوف من قصر الرئاسة وفندق البارون والعمارات المجاورة
وكنا بنراقب الحراس من فوق علشان نتاكد انهم مش هاييجوا علينا
وفجاة سمعنا صوت تك تك على السلم الخشبى اللى بيوصل للسطوح
قولت دة اكيد بيتمدد لاننا طلعنا علية وهو قديم فالخشب بياخد وضعة تانى بعد الضغط علية
لكن لا
دة صوت حد طالع وخطوات منظمة وصوت رجل تقيلة
جرينا استخبينا فى اوضة على السطح واحنا بنقول خلاص احنا اتمسكنا وكنا بجد هنموت من الخوف (مين اللى بيجيب مية ؟؟؟؟)
وكنا مستنيين نشوف مين اللى طالع لكن انتظارنا طال ومافيش حد ظهر
جريت اشوف الحراس من فوق لاقيت العدد مكتمل وكلة بيتفرج على التلفزيون واخر تمام
قولنا لا كدة بجد مش طبيعى
الساعة بقت 12 الاربع بالليل والحاجات بدات تلعب معانا بجد
الصوت دة معناة انا جى اهو لكن انت مش شايفنى
احنا فى السطح يعنى لو شفنا اى حاجة مش طبيعية ماحدش هايسعف التانى لان قدما المشوار اللى طلعناة هننزلة جرى
نزلنا فعلا جرى وجوانا رعب بجد ماقدرش اوصفة
ماعرفش ازاى خرجنا برة القصر فى ثوانى وكنا بنجرى فى الجنينة
واحنا بننط لبرة من على السور قولتلة
(احنا مجانين....اللى حصل دة هاتحكية لولادك)
كنا فاكرين ان القصة خلصت
انت قريت اول سطر فوق بتاعcomplex EQ?
كدة خلصت الجزء الحقيقى واللى اقدر احكية على المنتدى
لكن ماكنتش اتوقع ان القصة ممكن تمتد معانا لبرة القصر
ودة اللى كان الرعب بعينة
واتفقت مع اصحابى (كريم وفهدودول حصل معاهم نفسالكلام لانهم دخلوا معى ا فى مرات مختلفة )ان اللى حصل مع كل واحد فينا اعتبرة ملف مقفول لان كل واحد مننا شاف العجب بعد اللى حصل وماكنتش تهيؤات وقررنا اننا مانتكلمش فية
ولما فى مرة حكيت الكلام اللى قولتة دة لواحد صاحبى معانا فى الكلية (هو فى ميكانيكا حاليا)
قاللى لاااااا لازم تكمل باقى القصة قولتلة لا بلاش احسنلك
كان مصرررر انة يسمع الباقى لدرجة انى قولتلة (بص يا اسلام انا مستعد احكيلك القصة اللى حصلت بعد الكلام دة لكل واحد بس بشرط)
قاللى اية هو ؟؟
(هاحكيهالك فى حمام جوة قصر البارون )
قولتلة كدة علشان اخوفة لكن كان ردة غير متوقع ....
ولانى كنت مجنون وهو عندة استعداد
قوللنا هانفذ الجملة دى
(هاحكيهالك فى حمام جوة قصر البارون)
الفكرة فى الموضوع انى جمعت احداث كتيير حصلت معاى على مدار اكتر من 3 سنين لكن رتبت الاحداث فقط بشكلاافضل تفهمة لما يتعرض
لكن بدون اضافات ولا سلاطات هو دة اللى حصل فعلا وممكن لو مش مصدقنى ولو قابلتنى فى الكلية(للمرة التانية)اخليك تقابل الناس اللى حصلهم كدة لما دخلوا معى ولو حد قاللك احداث اكتر او اقل يبقى لك الكلام يعنى مش قصة وبحاول اخليها حقيقة .
وبالنسبة لانة كلام عادى ومش بيخوف اكيد لانك قاعد على جهازك مستريح ومش حاسس قوى بالمنظر جوة اشكال التماثيل هتلاقوا اغلبها شكلة غريب وجوة هتلاقوا على الجدران زخارف بارزة على شكل بوم وخفافيشوهتلاقى دم واشكال النجوم الخماسية وخفافيش طايرة من حواليك عادى شغال ..وكل دة وانت ماشى بعد 11بالليل فى القصر ومش معاك غير واحد بس وعلى ضوء الكشاف يعنى مش عارف اية اللى وراك ؟؟؟بالاضافة الى ان ارضية القصر خشب قديم جدا وبمجرد مشيك علية بيعمل صوت بجد كانك فى فيلم رعب.....ولاننا دخلنا اماكن الحراس نفسهم كانوا بيخافوا يدخلوها فدة خوفنا اكتر
فى ناس اكيد حست انى مزودها شوية وعامل جو رعب على الفاضى ...دة اللى كنت باحسة لما كان حد يحكيلى قبل مادخلة
لكن بعد المرة دى لاقيت ان مش معنى انك مش مقتنع بحاجة فدة مش معناة انها مش موجودة ..فى احداث كتييييييييييرة مارضيتش اكتبها
لان الناس هتختلف معى جامد
عايز تحس فعلا بالرعب روح القصر ولو عرفت تدخل (ماتسمعش كلامى احسن لك)حاول تقعد جوة فى مكان ومعك واحد بالكتير وخليك بهدوئك لاكتر من ساعة وركز
هتحس انك مش لوحدك وان فى اشارات هاتخليك تقوم تروح
الكلام دة بجد وحصل كمان مع ناس من الحراس وناس مغامرين تانيين
اللوحات اللى فى القصر تقريبا كلها اتسرقت وفى حاجات سمعت انها اتباعت فى مزادات
لان القصر ماكنش مع الورثة الحقيقين من حوالى 5 سنين ,,كان مع واحد سعودى وتانى سورى تقريبارجال اعمال (محمد بهجت الكسم)اسم واحد منهم
كان فى لوحة شوفت البرواز بتاعها فقط (مسروقة )كانت للبارون امبان نفسة وعينية كانت احجار كريمة (دة حسب كلام الحراس )هتلاقيها فى غرفة مكتبة فوق دفاية لونها ابيض فى اسود من الرخام الايطالى
ثانيا : فى تمثال صورتة موجودة كان باعتها لراجل واحد داس على وشة ,,دة موجود فعلا عايز تشوفة ..خلى ضهرك لصلاح سالم هتلاقى بابين للقصر واحد كبير فى المنتصف وواحد صغير فى الجانب الايمن ..افتح الصغير هتلاقية امامك وباقى التمثال مكسور ومرمى لكنة ثقييييل جدا
بالنسبة لانة بيدور فدة مش اكيد مع انها حاجة مشهورة عن قصر البارون وقصر السكاكينى مع انى لما نزلت البدروم شوفت مواسير الحارس قاللى ان فيها رولمان بلى لدوران القصر لكن سفير بلجيكا قال انة مش بيدور .. شوفت فتحة فى غرفة بطريقة معينة يقال ان دى لدخول الشمس لسرير البارون
على فكرة مش هتلاقى معلومات كتير عن الممر اللى فى البدروم اللى بيوصل لكنيسة البازليك لكنة موجود وشوفت مدخلة لكن مافيش حد بينزلة
بالنسبة لتصميم القصر فهو تحفة ومتاهة فى نفس الوقت ..مع ان القصر نفسة صغير (6 حجرات فوق الارض وحوالى 4 حمامات )لكن تلاقى غرف وحمامات ليها بابين تطلع من واحدة على التانية وتلاقى نفسك فى ممر ..
فهد وكريم
اكتر اتنين من اصحابى دخلوا معى القصر ..موضوع القصر بالنسبة لنا كان مجرد مغامرة صغيرة بنعملها علشان نغير الموود ..لانها خروجة غير تقليدية ..لكن دة كان اول سنة ..لاقينا ان معظم خروجاتنا بقت هناك ..حتى لو نزلنا نتمشى برضة نروح لهناك ..ارتباط غريب بس فى نفس الوقت كنت كل مرة بروح بحس انى اول مرة ادخلة ..فضلنا على الحال دة 3 سنين
ناس كتير قالولنا دة غلط ..مكان مش كويس ..مسكون ,لكن برضة بنروح ,
لحدما فى يوم خرجت مع فهد .قاللى :اسكت انا متبهدل ..لية مالك يابنى ?? قاللى انا باشوف حاجات غريبة ....
زى اية مثلا ؟..قاللى بحس ان فى حد تانى معى فى الشقة (مع انة عايش لوحدة حاليا) قولتلة ازاى برضة ؟
قاللى ساعات الراديو بيتفتح لوحدة واقوم اطفية الاقى انة اشتغل لوحدة بصوت عالى فى نص الليل ...لالالا قديمة قوى دى يافهد .كان فى رايى ان دة ممكن تهيؤ وكمان لان فى 7 الاف فيلم رعب عملوا الحركة دى قبل كدة
قاللى ساعات اكون قاعد فى الاوضة والاقى حاجة اتحركت مرة واحدة بسرعة ,,,اكيد بيتهيالك يابنى ..كان بيحلفلى انة فعلا بيشوف حاجات بتجرى لكن مش عارف يدقق فيها .بصراحة مع انة صاحبى بس ماكنتش مصدق خااااالص
لحد ماقاللى :بص انا فى حاجة حصلت مش عارف انساها ..كنت نايم ولوحدى وحسيت ان فى حد نايم ورايا وحاسس بنفس سخن قاللى انا خفت ابص ورايا ..فضلت مرعوب ..جيت ابص ورايا لاقيت واحد طالع من اوضتى ولمحت ضهرة بس........
قاللى حاجة غريبة ..انة بيحس انة مش قادر يتحرك ولا عارف يتكلم لما بيشوف او يحس بكدة (ممكن من الرعب)؟؟
قولت اكيد فهد صاحبى بيتخيل او بيشتغلنى لانى صعب جدا اصدق حاجة زى دى
ماكنش فى دماغنا خالص ان دة لية اى علاقة بالقصر
وفضلنا برضة نروح
ولما كنا عايزين ندخل القصر بالليل خالص ونقعد جواة علشان نستكشف براحتنا ..كان نوم الحراس فى الدور الارضى مشكلة لينا
فكنا بندخل بالليل قبل مايناموا ونتجول براحتنا ..واحنا خارجين نقلب لهم الفرش وننقل احجار من اماكن لتانية (ظهرى اتقطم من الشيل) ونقلب لهم اى كرسى موجود..مرة والتانية خافوا يناموا لانهم اقتنعوا انة فعلا مسكون
واحيانا فى جوالاتنا كنا بندخل الحمام اياة (اللى الحراس بيخافوا يفتحوة)
لحد مافى يوم حصل لى انا حاجة غريبة
اتهددت
لو سمحت ماحدش يسالنى اتهددت ازاى لانى بخاف افتكر ....بجد..
جالى تهديد انى ماروحش القصر ...مش فى القصر ..دة كان فى بيتى ..وحصللى نفس الشعور اللى فهد حكالى عنة قبلها بكذا شهر وماصدقتوش
وعلى الرغم من ان حاجة غريبة حصلت معى ...لكن برضة ماكنتش مصدق وقوللت دة اكيد كان بيتهيالى او كنت تعبان شوية
مع انى عارف وحاسس انة مش تهيؤ
اتصلت بكريم
قولتلة اللى حصل ...سكت ...وحسيت فى كلامة انة اخد الوضوع بجد ..قاللى بص .انا مصدقك...قولتلة اذا كان انا نفسى مش مصدق
قاللى مادام انت حكيت انا مصدقك
لكن كنت حاسس انة خاف ..لان اللى حصل مع فهد حصل معى وماتبقاش غير مييييييين؟؟؟؟؟
بيحكيلى انة كان بيخاف ينام لوحدة فى الفترة دى وكل شوية يقرا قران (كويس جت بفايدة) لحد مافى يوم زهق من كتر الخوف والقلق
وقف فى اوضتة وقال بصوت عالى ...لااااا انا مش خايف
مامتة قالتلة مالك يابنى ..مافيش مافيش حاجة
قوللنا اننا كنا واخدين العملية لعبة ..ندخل اماكن عارفين انها مسكونة علشان اية ..نلعب مع كائنات احنا مش شايفنها
وفى يوم قولت انا عايز اخد تذكار من القصر ...طب اخد اية اذا كان كلة اتسرق ؟؟؟
ايوة ..فى مراية مكسورة فى الدور التانى فى الاوضة الللى فيها الدم وكان فيها الحفلات ..هاخد حتة منها ..
وبالفعل اخدت قطعة صغيرة من المراية وكان عليها اثار دم (بقايا الحفلات)
لكن ماكنتش اعرف ان الدم دة كان طقوس سحر وتحضير جان
وللاسف اخدتها وحطيتها فى دولابى
حسيت ان اصحابى بداو بالفعل يخافوا واكيد كنت معاهم
كان فى واحد صاحبنا قاللى ان والدة بيعرف يتعامل مع الجان وعارف ايات تعالج المس وحاجات من دى ....بغض النظر عن الكلام دة صح او لا
قولتلة طب عايز اكلمة ...وبالفعل قابلتة ...قولتلة اللى حصل معى (ولو سمحت لتانى مرة ماحدش يسالنى اية اللى حصل )
لاقيتة ضحك وقاللى ...ثبتوك..وضحك تانى ...قولتلة مين دول اللى ثبتونى ؟؟؟
قاللى اللى هددك دة جايلك من القصر .....بلاش تروح تانى
اية الكلام الغريب دة ؟قصر اية ومين اللى جاللى ?هو فى اية ؟؟؟
قاللى بص ..المكان اللى بيكون مهجور بيكون عرضة لان الجن يسكنة ودة يبقى مكانة ??
طب وانا مالى ؟؟ قاللى لاااا ماهو كدة انت دخلت مكان مش مكانك
انت بتاذيهم
بلاش تروح تانى ...انا حذرتك
وحكالى عن ناس وحالات عالجها لناس فى الصعيد كانوا شغالين فى فتح المقابر الفرعونية وشافوا العجب
قاللى ان الجان اللى بيحرس شئ ثمين مهجور بيكون اسمة رصد
الرصد دة مش بيخلى حد يقرب من اللى بيحرسة
قاللى ...احمد انت ممكن تتاذى ...انت ربنا حاميك علشان بتصلى ماحدش منهم عملك حاجة لكن اللى حصل دة كان مجرد قرصة ودن...
شئ غريييييب وكلام غير منطقلى وغير مقنع بالمرة ..كنت مستغرب ان ازاى الجان يقدر يتحول من جسم اثيرى لجسم مادى يقدر يخبط ويشد او حتى يظهر
لان مجرد ظهورة ومشاهدة اى انسان لة ان الضوء سقط على الجسم دة وانكس لعينك وبالتالى قدرت تشوفة ...لكن ازاى وهو مخلوق من نار ومش حاجة مادية ؟؟؟؟
بصراحة فضلت اكذب اللى بسمعة وماقتنعتش خالص
وحكيت لاصحابى فى الكلية لحد ماصاحبى شجعنى وقاللى هانروح وزى ماحكيت لكم
قررنا اننا ندخل القصر تانى ..مع اسلام صاحبى
وكنت رايح وعايز اشوف ...ورونى هاتعملوا اية ؟؟؟
ودة كان من اكبر الغلطات اللى عملتها
ورحت القصر تانى
بعد التهديد ..........
يعنى الحركات دى قديمة ....هاقوللهم المرة الجاية يغيروا اللعبة
هانروح امتى ؟؟؟
يوم الخميس بالليل ان شاء الله ...وبكدة اتفقنا اننا هانروح القصر علشان اكملة باقى الحكاية هناك
كنت متوقع انة يجى قبل الميعاد ويعتذر ..لكن طلع راجل كويس وجالى فى ميعادة ..كان قلقان وقاللى طب اية اللى حصلك؟؟
واحنا رايحين القصر حكيتلة كل حاجة بالتفصيل....قلق اكتر ...بس هاندخل برضة
وصلنا ...لاقينا الجو حوالين القصر غريب ..امن كتير واقفين باسلحة جامدة .(اية دة هم عارفين ان احنا جايين ؟؟؟؟)
طلع تقريبا فرح لشخص مهم فى فندق البارون ودى الحراسة ...بس كان شكلة حد مهم قوى
طب اية ؟؟؟؟مش هاندخل ولا اية النظام..استنينا يمكن الجو يهدى لكن ظباط مباحث فى كل حتة ..(اية الرخامة دى )
اخدنا اكتر قرار غبى هو اننا نجرى بسرعة وننط من الكان المعتاد لكن كل واحد لوحدة ...يالا ؟؟يالا
بسسسسست....اطلعلى برة انت و هو ...دة كان ظابط امن شافنا ..طلعنا ..بطايقكم ..صاحبى طلع بطاقتة وكان معاى بطاقة الترشيح للكلية
المفروض انة كان يبعتنا لظابط اعلى ونروح القسم نبات لنا ليلة كويسة ..بصراحة قعدنا نقوللهم اننا فى هندسة عين شمس وقسم عمارة وداخلين نصور علشان محتاجين صور للمشروع .....ودخلت عليهم وسابونا وادولنا البطايق....
اكيد هاتفتكروا اننا قولنا خلااااص كدة
لكن لا ....كنا بندور على مكان تانى ننط منة .....تانى قرار غلط
وفى نفس الوقت افتكرت تحذير والد صاحبى انى ماروحش القصر تانى ..
واحنا بنلف حوالين القصر علشان نلاقى اى مكان هادى ننط منة ...كنا على الناحية اليمين للقصر ..هتلاقى شارع مدخلة ظلمة وطوييل..وهادى
لاقينا 3 رجالة واقفين على ناصية الشارع دة شكلهم عادى جدا..لكن باصيين لنا ..اول ما قربنا اتكلموا مع بعض بس من الواضح انهم ناويين يجولنا
مالهم دول..اللى جى فى دماغى ان الظابط قال لبتوع المباحث يجيبونا علشان مايمسكوناش ادام الفندق والفرح والمنظر العام ..يمكن
احسن حاجة نفلت منهم حتى لو نجرى
لاقيت واحد قرب مننا وبيندة ..ياكابتن
قولتلة امشى يا سلام ..اسلام وقف يشوفة ...
يا كابتن ...لو سمحت يا جماعة حد بيعرف يقرا انجليزى ؟؟؟
قولتلة لاالا مافيش حد ..اسلام وقف قاللى استنى نشوفهم
كان ماسك فى ايدة ورقة ....ادى الورقة لاسلام......امشى يا اسلااااااااام
لاقيت باقى الناس بيقربوا من صاحبى ..وهو لاقيتة بيقرا ..رجعت اشوف فى اية؟؟
قريت النص العلوى من الورقة واسلام قراالجزء التانى ...الورقة مكتوب فيها بخط كبير بالانجليزى الاتى بالنص :
remember that it was your choice
good luck ya bashmohandes
اسلام بص لى ...بصيت للراجل لاقيتة مبتسم بشكل غريب ..كانة بيقول هااة وصلت؟؟لاقيت الاتنين التانين بيقربوا علينا ...قولتلة امشى بسرعة يا اسلام ....اللى فاكرة اننا فى لحظة كنا معديين الشارع وبنحاول باى شكل ندخل فى اى مكان فى روكسى فية زحمة فى وسط الناس
عايزين نهرب
من كتر الخوف مش عارفين في اية .....مين دول ؟عايزين اية ؟واية اللى موقفهم الساعة 10 ونص بالليل فى الشتاء على ناصية شارع محدش ماشى فية اصلا ..اية هو (your choice)؟؟...عرفوا منين اننا فى هندسة ؟ومين اللى كتب الورقة ؟؟؟يمكن كان اختيارى انى اروح واشوف هايعملوا اية بعد التهديد؟؟؟ ويعنى اية (good luck)؟؟؟عارف انها حظ سعيد ...بس اية المناسبة ؟؟؟
حاولنا نفسرها ...مالقيناش غير 3 تفاسير للى حصل :
1.انة واحد من المباحث :بس بتوع المباحث ماكنش محتاج يعمل الفيلم دة ..كانوا شالونا اصلا
2.انهم حرامية وعايزين يثبتونا :ماهم ثبتونا بالفعل وكنت ماسك موبايلى فى ايدى ولو عايز يا خدة كان اخدة لانة كان واحد زى الثورومعاة اتنين كمان
3.انها جت صدفة بحتة لناس بيهرجوا:فى حدينزل من بيتة علشان يهرج مع ناس مايعرفهمش فى عز الثلج بالليل
خانة رابعة فاضية .....احنا متفقين اننا نرجع اى حاجة تحصل لانها حاجة طبيعية .....لكن دة مش طبيعى
المهم اننا رجعنا بنكلم نفسنا فى اليوم دة
حسيت اننا كنا بنهرج لكن العملية ابتدت تقلب ..وان الناس كلها قالت المكان فية سحر والحراس نفسهم قالوا لى ان المكان مسكون ..وانهم بيسمعوا اصوات تخبيط وكان فى حياة جوة القصر يدخلوا مايلاقوش حاجة
ماكنتش مصدق ..لكن دلوقت العملية طلعت برة القصر ...
روحت احكى لابن خالتى ...هو بيحب يقرا فى الحاجات الرعب الحقيقية والقصص ...,اثناء ماكنت باحكيلة لاقيت وشة اتغير ..ولما قولتلة الجملة اللى قراتها فى الورقة لاقيتة سكت ..........
قاللى انا كنت فاكر انها فى القصص بس ...هى اية دى ؟?الجملة دى..بكامل ارادتك الحرة ....الجملة دى قريتها فى قصة لاحمد خالد توفيق لكن كنت فاكرها كدة ..لكن الواضح انها حقيقية ...حصلت مع ناس قبل كدة وادينى صدقت لانها حصلت معاك......دة كلام بن خالتى ..مع العلم انى مش بقرا اى حاجة من قصص الرعب الخيالية ..لكن ماتوقتش فى يوم انى اكون انا اللى بعملها على الحقيقة
قاللى اوع تروح القصر دة تانى ...مش بهرج ...حاضر ..مش حاضر اياك تروح تانى
روحت حكيت لولد صاحبى ...لاقيتة سكت ....انا مش قولتلك ماتروحش تانى ....
مش عارف ارد ...المهم ان حصلت احداث غريبة ...يتصل بناس ماتعرفش عنى اى حاجة ولا عرفهم الاقيهم عارفين اللى حصل فى القصر ...
هو فى اية بالظبط؟؟؟
بعد لقاءات مع ناس غريبة ....اتفقنا على انى ماروحش القصر تانى لان على حسب مافهمت ..انى ازعجتهم بقراتى القران فى القصر وانا خايف
قولت خلاص ...قاللى تمسح صور القصر من على موبايلك وتتخلص من اى حاجة اخدتها منة ....وقرا بعض الايات وقاللى لو رحت القصر تانى ماتجيليش
لاخلاص كدة...الغريب انى لما روحت دورت على المراية اللى اخدتها من هناك ...لكن اية دة ?المراية مش موجودة ....طب كان معى اتنين صورة فوتغرافيا كنت مصورها بالكاميرا مش موبايل ....الصور فين ؟؟؟
مش مهم ..المهم انها بعدت عنى ..ازاى ?? برضة مش مهم.
بعد فترة طويييلة
تررررررررررن ..الو .ممكن اكلم احمد ...ايوة يا كريم ازيك ...الحمد للة ...احمد انا متبهدل ...مالك فى اية ...لا ماينفعش دلوقت لما اشوفك
ولما خرجنا ....اية مالك بقى ....
كريم:انا سمعت كلام ...تهديد
اهلااااااااا ,انت روحت القصر تانى ؟؟؟
ايوة.
القصة كدة انتهت ...لكن دة بالنسبة لى ولاصحابى اللى دخلوا معى ...لكن قصص القصر مش بنتنتهى ..لانة كان..ومازال عندة الرغبة فى الاحتفاظ باسرارة .......وغموضة .
مزاد علني
في نهاية شهر ابريل من عام ..1954 أعلنت المجموعة البلجيكية التي تتولي ادارة شئون 'امبان الابن' عرض قصر البارون للبيع من خلال مزاد علني.. وشمل هذا المزاد ايضا بيع محتويات القصر من تحف واثاث وانتيكات.
وعقدت جلسة المزاد في القصر الجميل.. واشتري من اشتري التحف والاثاث والمفروشات التي احتواها القصر الفاخر.. وجاء الدور علي القصر نفسه.. تلك التحفة المعمارية نادرة التكرار ليرسو المزاد علي 3 من الاثرياء العرب.. رجل الأعمال السوري محمد بهجت الكسم والسفير السعودي محمد علي رضا وشقيقه علي علي رضا.
ودفع الثلاثة في القصر البديع مبلغ مائة وستين ألف جنيه '!'
كان الملاك الجدد لقصر البارون يهدفون لاستغلاله كناد عالمي لاثرياء العالم.. ولكنهم اصطدموا بالقوانين السائدة في تلك الفترة والتي تؤكد علي ضرورة اشراف وزارة الشئون الاجتماعية علي مثل هذا النوع من المشاريع.
|
|
|
|