ولا يهمك حبيبتي هي انا هون وجاهزة لجاوب عن اسئلتك

بالنسبة للسؤال الاول موقف صار معي بالمطبخ

ييي كتييير رح احكيلك اخر واحد هاد جديد كنت عم اطبخ رز والواتس اب شغال بالمراسلات

على كذا جهة وبما انو انا شطورة مابيعيئني شي ايد على الجوال وايد عم تضيف ملح للرز

واذ طعمته حلوة رجعت ضفت ملح مرة تاني وايدي ما وقفت عن الواتس اب والا صار الامر اسوأ

وبلحظة بتطلع محسوبتكم عم تضيف سكر بدل الملح اي لا تفكرو الخطأ مني كل الحق

على التكنولوجيا

أما السؤال التاني الاصح كام طبخة مابعرف اطبخ لان هي خبرة سنوات واكتر شغلة ماهرة فيا

الكبة المشوية ولا تستغربو كتير لان هي اكلة زوجي وابني المفضلة وغصب عني اتعلمتها

وكتير الشاكرية بتطلع معي طيبة لان هي اكلتي المفضلة . لكن اللي مابحب اعملو بالبيت

هوة الحلويات بفضل تكون جاهزة والحمدلله زوجي استسلم للامر الواقع

والسؤال التالت اذا في عزيمة بحب جهز كل شي تقريبا من قبل بيوم لاتفرغ تاني يوم لاشياء

تاني متل ترتيب البيت والاهتمام بالمظهر اللائق لاستقبال الضيوف وخاصة اذا كانو

من طرف زوجي اهلو او اصدقائو لازم كل شي يكون تمام والكل يحكي بالمنيح

اما اذا اهلي ياسلام كل وحدة بسلما شغلة وانا بصب متة وبسايرون وبسليون وهيك بيطلع

الشغل من تحت دياتن واذا في ولد شقوة ياولوووو اذا امه عم تشتغل بتحمل وطبعا ماني

مبسوطة داخليا

اما اني اعملكم ترويئة والله انتو بتستاهلو اكتر من ترويئة لكن اعذروني لان افطارنا بيكون الساعة

6 الصبح قبل دوام المدرسة وبكون مستعجلة ومشغولة كتير

هي بتصير يوم العطلة ممكن

انا مادخلت المطبخ بكل معنى الكلمة الا بعد الزواج بحكم الدراسة والوظيفة قبل

اما اول شئ طبختو كان فاصوليا ورز وطلعت منيحة مو بشطارتي بشطارة الميمي الله يطول

عمرا كل شوي دقلا تلفون واسئلا

هي اجاباتي وبكل صراحة

وشكرا الك ولاسئتلك الظريفة

وياللا اذا حابب حدى من الاعضاء يسأل انا جاهزة

تحياتي الكم جميعا