[عزيزي الزائر يتوجب عليك التسجيل للمشاهدة الرابطللتسجيل اضغط هنا]

مرحبا

اللغة المحكية العامية انسب شي لهيك موضوع انا برأيي, كل واحد فينا بيستعمل احيانا عبارة ( لوكنت مكاني ) باغلب الاحاديث يلي بيكون غالب عليها طابع التبرير او طابع شرح الذات, اكتر من مرة باكتر من مناسبة ومكان حس حالي متدايئ لما اسمع هي الجملة , مو لانو عم اعتبر الشخص منافق او كزاب , بالعكس ... لاني فعلا حاول حس فيه عنجد شو يلي خلاه يوصل لهون ويكون بهاد المكان يلي هو فيه هلئ وعم يشرح ويبرر نفسو ئدامي...

بالفعل لو كنت مكانو شو كنت ئدرت اعمل وشو كنت حسيت , وكيف كنت ممكن اتصرف؟ احسن يا ترى ؟!! اسوء؟؟؟ الطف؟؟؟ كل اشارات الاستفهام هي حتضل موجودة لوئت انا بالفعل حط حالي مكانو , او القدر يحطني بمكانه بالفعل وحس بهاد الشعور

فكرتي ببساطة كل واحد فينا ( حابب انو يشارك بالموضوع ) يكتب عن موقف هو بمكان التاني , او يحط حدى بمكانو ويحكي لحتى يخلص الحكي , يعني يحكي بلسان حالو او بلسان التاني ...

مو كتير زابطة مع الكل مو هيك؟؟؟ على الاقل عم حاول افتح باب تاني ينشاف منو شي موجود بشكل يومي

انا بعرف انو موضوعي هاد عمره مو اكتر من اسبوعين بالمنتدى ويمكن تلاتة على ابعد تقدير , بعدين حينزل ويغوص للقاع متلو متل باقي المواضيع..... ويمكن بعد فترة يمكن تكون اشهر ويمكن تكون سنين , يرجع حدى يكتب بهالموضوع.... ساعتا ممكن يطفو الموضوع للسطح مرة تانية ..... بعرف لو كان اي حدى تاني مكاني كان كتب الموضوع احسن من هيك , بس ماحدى بيعرف شو يلي خلاني كون هون بمكاني